ما هى اسرار الكوابيس الليليه ؟؟؟ أسبابها وعلاجها


تعالى هحكيلك قصة حلوة أوي..

كلمة كابوس بالانجليزي اسمها "nightmare" ودي جاية من كلمة نوردية قديمة جدًا اسمها mare.. بس إيه mare دا بقى يا سيدي!

من بتاع 2000 سنة كده أو أقل، مكنش الناس وصلوا للمفاهيم الحديثى للعلم وخاصة في الطب، فكانوا بيفسروا أي مرض نفسي او جسدي يحصلهم على اساس إنه لعنة من الإله أو مجرد مس من شيطان بيحاول يضرهم، وعالاساس دا طبعًا بدأ فلكلور الشياطين في كل حته في العالم عشان يفسروا او يبقى عندهم سبب للحاجة اللي بتحصل مش فاهمينها دي.

في القبائلة الألمانية القديمة وعند الاسكندنافيين والمناطق الوثنية دي كُلها، مكنوش يعرفوا يعني إيه فكرة "شلل النوم".. أصل يعني إيه تبقى نايم عالسرير بس بتسمع وتشم وتشوف! يعني إيه جسمي يبقى مربوط ومشلول بس أنا واعي وفايق لكل حاجة حواليا! أكيد في قوة خفية هي اللي عاملة فيا كده.. أكيد دا شيطان!

طبعًا في الوقت دا كانوا بيناموا في أكواخ على ضوء القمر وصوت أحصنتهم والقش والمتاع بتاعهم كله حواليهم في الضلمة، فغصب عنك لما تتحط في وضع زي دا، عقلك هيبقى خايف.. هتتجن طبعًا وخصوصًا إنه عقلك بدائي لسه ومعندكش مفاهيم العلم، فعقلك هيخدع عينك ويبدأ يتخيل إنه في كائن ما قاعد عليا في وسط الضلمة مكتفني.. ايه دا، في صوت حصان.. يبقى كمان بيجي على حصان.
ومن هنا جات اسطورة او فلكلور الـ mare وهو شيطان (في الديانة الوثنية) بيفضل طول النهار يجري على حصانه، ولما بيجي الليل بيحب يدخل المنازل إللي اصحابها نايمين يستريح عشان محدش يشوفه، لكن على مايبدوا إنه بيحب يفضل جالس على اجسامهم واحيانًا بيستيقظوا يشفوه :"| فبيقيد حركتهم ويشلهم لغاية الصبح ويمشي على حصانه تاني.

هي دي قصة الـmare لما بدأت من بتاع 2000 سنة عند الوثنيين وانتقلت من بعدها للألمان والصين واليابان وكل حضارة كانت بتحط التاتش بتاعها ولغاية ماراحت لتايلاندا وتركيا وكوريا والفلبين وباكستان والكلام داكله.. وبعدين دخلت اللغة الانجليزية.
كلمة كابوس بتتكون من مقطعين mare على اسم الشيطان، وnight عشان بيجي بالليل.

لغاية ما وصلت للعرب وسموه الجاثوم بنفس القصة :"| إنما في النهاية دا مجرد ظاهرة او حالة طبية بتحصل للناس عادي وليها تفسير علمي المفروض بعد 2000 سنة يعني من انتشار الخرافة دي تكون مصدقة.

لوحة The Nightmare للفنان Henry Fuseli سنة 1781.

مواضيع ذات صلة


الابتساماتالابتسامات

الأرشيف